হৃদয়ৰ উপত্যকাত সোণবৰণীয়া
পখীৰ সুৰৰ মূৰ্ছনা
অস্তমিত সূৰুযে দি গ'ল
অবৰ্ণনীয় এভৰাঁল সুখৰ বতৰা ...
এয়া হেনো শৰত
আগমনৰ সময়
দিগন্তৰ সেউজীয়া ৰূপ
সঁজাল হোৱাৰ সময়
কাচিয়লী ৰ'দৰ হিৰন্ময়ী আভাই
শৰতক আনিছে আদৰণি জনাই
স্নিগ্ধ আঁচল উৰুৱাই
বতাহৰ সোপানে সোপানে
শুৱনি লাৱনী খোজে
লয়লাস ভঙ্গিমাৰে
নামিছে প্ৰকৃতি ৰাণী
মমতাময়ী ধৰাৰ বুকুলৈ
সিঁচিবলৈ প্ৰেমৰ সঁচুৱা
শেৱালী জুপিৰ গাভৰু মন
চঞ্চল খিলখিল হাঁহি
শিহৰিত যৌৱনা দেহ
কোনোবা প্ৰেমিক কবিৰ
জীয়া কলিজা ডেই পুৰি যায়
কঁহুৱাৰ শুভ্ৰ বসন
বতাহৰ ভাজে ভাজে ঢৌ খেলি
উলাহতে আপোন পাহৰা
মনোমুগ্ধকৰ শাৰদীৰ নিবিড়
আলিঙ্গনত মৰুদ্যানো জীপাল
নিয়ৰৰ কনিকাৰ দুবৰিত সহবাস
উজ্বল মুকুতাৰ
জোনাকীৰ সতে লুকা ভাকু
সেউজ প্ৰকৃতিৰ ৰাগী লগা
ৰসাল ঘ্ৰাণত
মতলীয়া মোৰ কোমল হৃদয়
শৰত প্ৰকৃতিৰ এক নিৰ্মল ভাস্কৰ্য
সৌন্দৰ্যৰে জীৱন আলোকিত কৰা
________✍হিমাদ্ৰী দাস
সোনাপুৰ , কামৰূপ(ম) অসম
